ARJUN SAMAACHAARAM
Newspaper Banner
Date of Publish : 20 November 2026, 5:44 pm Posted by : ARJUN SAMAACHAARAM DESK

యోగి ఆదిత్యనాథ్ తల్లి సావిత్రి దేవి కన్నుమూత – ఉత్తరాఖండ్‌లోని స్వగ్రామం పంచూర్‌లో 91 ఏళ్ల వయసులో తుదిశ్వాస – పుట్టెడు దుఃఖంలోనూ ముందుగా నిర్ణయించిన అధికారిక కార్యక్రమంలో పాల్గొన్న యోగి ఉత్తరాఖండ్‌:

ఉత్తరాఖండ్‌: అర్జున్ సమాచారం:
ఉత్తరప్రదేశ్ ముఖ్యమంత్రి యోగి ఆదిత్యనాథ్‌కు మాతృవియోగం కలిగింది. ఆయన తల్లి సావిత్రి దేవి (91) కన్నుమూశారు. ఉత్తరాఖండ్‌లోని పౌరీ గఢ్వాల్ జిల్లాలో ఉన్న తమ స్వగ్రామం పంచూర్‌లోని నివాసంలో ఆమె తుదిశ్వాస విడిచారు. వయోభారం, ఇతర అనారోగ్య సమస్యలతో పాటు శ్వాస తీసుకోవడంలో ఇబ్బంది తలెత్తడంతో ఆమె మృతి చెందినట్లు కుటుంబ సభ్యులు తెలిపారు.
సావిత్రి దేవి మరణవార్తను పౌరీ గఢ్వాల్ సీనియర్ సూపరింటెండెంట్ ఆఫ్ పోలీస్ (ఎస్ఎస్పీ) సర్వేశ్ పన్వార్ ధ్రువీకరించారు. ఆమె భౌతికకాయానికి రేపు ఉత్తరాఖండ్‌లోని హరిద్వార్‌లో అంత్యక్రియలు నిర్వహించే అవకాశం ఉందని ఆయన వెల్లడించారు. ఈ విషయమై పోలీసు, స్థానిక జిల్లా యంత్రాంగం కుటుంబ సభ్యులతో సమన్వయం చేసుకుంటోందని పేర్కొన్నారు. గతంలో ఆమె అనారోగ్యానికి గురైనప్పుడు రిషికేశ్‌లోని ఎయిమ్స్ ఆసుపత్రిలో చేర్పించి చికిత్స అందించారు. సావిత్రి దేవి మృతి పట్ల ఉత్తరాఖండ్ ముఖ్యమంత్రి పుష్కర్ సింగ్ ధామి తీవ్ర సంతాపం వ్యక్తం చేశారు. తల్లి ప్రేమ, ఆశీస్సులు జీవితంలో ఎంతో అమూల్యమైనవని, ఆమె మరణం కుటుంబానికి తీరని లోటని పేర్కొన్నారు. దివంగత సావిత్రి దేవి పవిత్ర ఆత్మకు శాంతి చేకూరాలని, ఈ తీరని దుఃఖాన్ని తట్టుకునే శక్తిని యోగి ఆదిత్యనాథ్ కుటుంబానికి ప్రసాదించాలని కేదార్‌నాథ్ స్వామిని ప్రార్థిస్తున్నట్లు చెప్పారు. మరోవైపు, కన్నతల్లి మరణవార్త తెలిసినప్పటికీ సీఎం యోగి ఆదిత్యనాథ్ వ్యక్తిగత బాధను పక్కనపెట్టి కర్తవ్యానికే ప్రాధాన్యతనిచ్చారు. గోరఖ్‌పూర్‌లో ముందుగా నిర్ణయించిన అధికారిక షెడ్యూల్ ప్రకారం విద్యార్థులకు ట్యాబ్లెట్ల పంపిణీ కార్యక్రమంలో ఆయన యథావిధిగా పాల్గొన్నారు. ప్రజాసేవకే తొలి ప్రాధాన్యమని చాటిచెబుతూ ఆయన తన బాధ్యతలను కొనసాగించడం గమనార్హం.
=====================