ప్రైవేట్ ఆసుపత్రుల కార్మికులకు 8. గంటల పని విధానం అమలు చేయాలి,
అర్హులైన ఉద్యోగులకు ఈఎస్ఐ, పీఎఫ్ సౌకర్యాలు కల్పించాలి – కనీస వేతనాలు చెల్లించాలి,
హెచ్ఎంఎస్ ,జిల్లా అధ్యక్షుడు నరెడ్ల శ్రీనివాస్ డిమాండ్.
అర్జున్ సమాచారం. అక్టోబర్ 29. (స్టాఫ్ రిపోర్టర్) మంచిర్యాల జిల్లా.
మంచిర్యాల జిల్లాలోని ప్రైవేట్ ఆసుపత్రుల్లో పనిచేస్తున్న కార్మికులు, ఉద్యోగులకు చట్టప్రకారం రోజుకు 8 గంటల పని విధానాన్ని అమలు చేయాలని, అర్హులైన ఉద్యోగులకు ఈఎస్ఐ, ప్రావిడెంట్ ఫండ్ (పీఎఫ్) సౌకర్యాలు కల్పించాలని హింద్ మజ్దూర్ సభ (హెచ్ఎంఎస్) మంచిర్యాల జిల్లా అధ్యక్షుడు నరెడ్ల శ్రీనివాస్ డిమాండ్ చేశారు. కనీస వేతన చట్టాన్ని అమలు చేయడంతోపాటు, ఒకే విధమైన పని చేసే ఉద్యోగులకు సమాన వేతనం అందించాలని కోరారు.
ఈ మేరకు గురువారం అసిస్టెంట్ లేబర్ కమిషనర్‌కు హెచ్ఎంఎస్ నాయకులు వినతిపత్రం సమర్పించారు. ఈ సందర్భంగా నరెడ్ల శ్రీనివాస్ మాట్లాడుతూ జిల్లాలోని పలు ప్రైవేట్ ఆసుపత్రుల్లో పనిచేస్తున్న కార్మికులు, ఉద్యోగులు తమకు చట్టప్రకారం లభించాల్సిన హక్కులు, వేతనాలు, సామాజిక భద్రతా సౌకర్యాలను పూర్తిస్థాయిలో పొందలేకపోతున్నారని పేర్కొన్నారు. కార్మికుల సమస్యలను గుర్తించి సంబంధిత అధికారులు తక్షణమే స్పందించాలని విజ్ఞప్తి చేశారు.
ఆసుపత్రి సిబ్బందికి న్యాయమైన వేతనాలు కల్పించాలి,
ప్రైవేట్ ఆసుపత్రుల్లో పనిచేస్తున్న స్వీపర్లు, శానిటేషన్ సిబ్బంది, వార్డుబాయ్స్, ఆయాలు, రిసెప్షనిస్టులు, ల్యాబ్ సిబ్బంది, నర్సింగ్ సిబ్బంది, సెక్యూరిటీ గార్డులు తదితర ఉద్యోగులకు వారి విధులు, బాధ్యతలు, వర్తించే చట్టపరమైన నిబంధనలకు అనుగుణంగా న్యాయమైన వేతనాలు చెల్లించాలని కోరారు. ఆసుపత్రుల్లో పనిచేసే సిబ్బందితో నిర్ణీత పని గంటలకు మించి విధులు నిర్వహింపజేసినప్పుడు చట్టప్రకారం ఓవర్‌టైమ్ వేతనాలు చెల్లించాల్సిన బాధ్యత యాజమాన్యాలపై ఉందని స్పష్టం చేశారు.
అలాగే అర్హత కలిగిన ఉద్యోగులకు ఈఎస్ఐ, పీఎఫ్ సౌకర్యాలు కల్పించాలని, ఉద్యోగుల భవిష్యత్తు భద్రతను దృష్టిలో ఉంచుకుని యాజమాన్యాలు తమ చట్టబద్ధమైన బాధ్యతలను సక్రమంగా నిర్వర్తించాలని సూచించారు. ఒకే విధమైన విధులు, బాధ్యతలు నిర్వహిస్తున్న ఉద్యోగుల విషయంలో వర్తించే నిబంధనల ప్రకారం సమాన వేతనం అందేలా చర్యలు తీసుకోవాలని కోరారు. కార్మికుల శ్రమకు తగిన గుర్తింపు, గౌరవప్రదమైన పని వాతావరణం కల్పించడం ఆసుపత్రుల యాజమాన్యాల బాధ్యత అని పేర్కొన్నారు.
ప్రైవేట్ ఆసుపత్రుల్లో కార్మిక శాఖ తనిఖీలు చేపట్టాలి.
మంచిర్యాల జిల్లాలోని ప్రైవేట్ ఆసుపత్రుల్లో కార్మిక శాఖ అధికారులు సమగ్ర తనిఖీలు నిర్వహించాలని నరెడ్ల శ్రీనివాస్ కోరారు. ఆసుపత్రుల్లో పనిచేస్తున్న ఉద్యోగుల సంఖ్య, వారి పని గంటలు, చెల్లిస్తున్న వేతనాలు, హాజరు రికార్డులు, ఈఎస్ఐ, పీఎఫ్ అమలు తీరును పరిశీలించాలని విజ్ఞప్తి చేశారు. కార్మిక చట్టాల అమలులో ఎక్కడైనా ఉల్లంఘనలు జరిగినట్లు గుర్తిస్తే సంబంధిత యాజమాన్యాలపై విచారణ జరిపి, చట్టప్రకారం చర్యలు తీసుకోవాలని డిమాండ్ చేశారు.