రంగారెడ్డి జిల్లా కలెక్టర్ కు జైలు శిక్ష ఐఏఎస్ తీరుపై తెలంగాణ హైకోర్టు ఆగ్రహం.

📰 Generate e-Paper Clip

అర్జున్ సమాచారం:
కోర్టు ఆదేశాలను ఉద్దేశపూర్వకంగా ఉల్లంఘించిన కేసులో (కోర్టు ధిక్కరణ) రంగారెడ్డి జిల్లా కలెక్టర్
సి. నారాయణ రెడ్డికి తెలంగాణ హైకోర్టు 6 నెలల సాధారణ జైలు శిక్ష, రూ. 2,000 జరిమానా విధిస్తూ సంచలన తీర్పునిచ్చింది.
న్యాయస్థానం పట్ల నిర్లక్ష్యంగా వ్యవహరించిన సదరు ఐఏఎస్ (IAS) అధికారి తీరుపై జస్టిస్ కె. లక్ష్మణ్ నేతృత్వంలోని ఏకసభ్య ధర్మాసనం తీవ్ర ఆగ్రహం వ్యక్తం చేసింది.
* భూముల వివాదం: రంగారెడ్డి జిల్లాలోని మూడు ల్యాండ్ పార్సిళ్లను (ప్లాట్లను) రిజిస్ట్రేషన్ చట్టం-1908లోని సెక్షన్ 22-A ప్రకారం ‘నిషేధిత ఆస్తుల జాబితా’ (Prohibited Properties List) నుంచి తొలగించాలంటూ బాధితులు దరఖాస్తు చేసుకున్నారు.
* కోర్టు ముందస్తు ఆదేశాలు: దీనిపై స్పందించిన తెలంగాణ హైకోర్టు 2025 ఆగస్టులో ఒక ఉత్తర్వు జారీ చేస్తూ.. బాధితుల అభ్యర్థనను 60 రోజుల్లోగా పరిశీలించి తగిన నిర్ణయం తీసుకోవాలని కలెక్టర్‌ను ఆదేశించింది.
* కలెక్టర్ నిర్లక్ష్యం: కోర్టు గడువు విధించినప్పటికీ కలెక్టర్ నిర్ణీత సమయంలోగా ఎలాంటి చర్యలు తీసుకోలేదు. దీంతో బాధితులు 2025 అక్టోబర్ 15న హైకోర్టులో కోర్టు ధిక్కరణ పిటిషన్ దాఖలు చేశారు.
* హడావుడి చర్యలు: కోర్టు ధిక్కరణ పిటిషన్ దాఖలైన తర్వాతే యంత్రాంగం కదిలి, హడావుడిగా నోటీసులు ఇచ్చి 2026 ఫిబ్రవరిలో, ఆపై జూలైలో సదరు వినతిని తిరస్కరిస్తూ ఉత్తర్వులు జారీ చేసింది.
హైకోర్టు ఆగ్రహం & తీర్పు
కోర్టు ధిక్కరణ పిటిషన్ వేసిన తర్వాతే అధికారులు స్పందించి అప్లికేషన్ తిరస్కరించడంపై హైకోర్టు తీవ్రంగా తప్పుబట్టింది. పక్కనే ఉన్న మరో ప్లాట్‌ను నిషేధిత జాబితా నుంచి తొలగించి, బాధితుల ప్లాట్లను మాత్రం ఉద్దేశపూర్వకంగా కాలరాసే ప్రయత్నం చేశారని ఆగ్రహం వ్యక్తం చేసింది.
న్యాయస్థానం ఇచ్చిన ఆదేశాలు సరైనవా కావా అని ప్రశ్నించే హక్కు అధికారులకు లేదని, ఆదేశం ఏదైనా ఖచ్చితంగా అమలు చేయాల్సిందేనని సుప్రీంకోర్టు తీర్పులను ఉటంకిస్తూ స్పష్టం చేసింది. కలెక్టర్ ఇచ్చిన వివరణ సంతృప్తికరంగా లేకపోవడంతో ఆయనను దోషిగా తేల్చి శిక్ష ఖరారు చేసింది.
4 వారాల పాటు శిక్ష నిలిపివేత
కలెక్టర్‌కు 6 నెలల జైలు శిక్ష విధించినప్పటికీ, ఈ తీర్పుపై ఆయన పైకోర్టులో (అప్పీల్) సవాల్ చేసుకునేందుకు వీలుగా శిక్ష అమలును హైకోర్టు 4 వారాల పాటు నిలిపివేసింది
=================