వాషింగ్టన్,అర్జున్ సమాచారం:
అమెరికా మధ్యంతర ఎన్నికల్లో అధికార రిపబ్లికన్ పార్టీ ఓటమికి ఇరాన్‌తో కొనసాగుతున్న యుద్ధమే ప్రధాన కారణమని ఉపాధ్యక్షుడు జేడీ వాన్స్ అభిప్రాయపడ్డారు. గతంలో డొనాల్డ్ ట్రంప్‌కు మద్దతుగా నిలిచిన అనేకమంది ఓటర్లు ఈసారి డెమోక్రటిక్ పార్టీ వైపు మొగ్గు చూపారని ఆయన పేర్కొన్నారు. ఎన్నికల ఫలితాలపై సోషల్ మీడియా వేదిక ‘ఎక్స్’ ద్వారా ఆయన తన విశ్లేషణను సుదీర్ఘంగా పంచుకున్నారు. ఓటింగ్ శాతం తగ్గడం వల్ల తాము ఓడిపోలేదని, తమ మద్దతుదారులు ప్రత్యర్థి పార్టీకి ఓటు వేయడమే అసలు సమస్య అని వాన్స్ స్పష్టం చేశారు. ఇరాన్ యుద్ధాన్ని ముగించాలని, పెరుగుతున్న జీవన వ్యయం, ద్రవ్యోల్బణాన్ని నియంత్రించాలని ఓటర్లు బలంగా కోరుకున్నట్లు ఆయన తెలిపారు. అమెరికా ప్రయోజనాలకు అత్యంత ప్రాధాన్యం ఇవ్వడం, ఇజ్రాయెల్‌తో సంబంధాలపై పునఃసమీక్ష వంటి అంశాలు కూడా ఓటర్ల తీర్పును ప్రభావితం చేశాయని వివరించారు. యుద్ధం కారణంగానే తాము పరాజయం పాలయ్యామని అధ్యక్షుడు డొనాల్డ్ ట్రంప్ సైతం అంగీకరించారని వాన్స్ పేర్కొన్నారు. అయితే, ఈ వాదనతో ట్రంప్ పాక్షికంగానే ఏకీభవించడం గమనార్హం. ఇరాన్ అణ్వాయుధాలను సమకూర్చుకోకుండా నిరోధించడానికి సైనిక చర్య తప్పనిసరి అయిందని, మళ్లీ అలాంటి పరిస్థితి ఎదురైనా ఇదే నిర్ణయం తీసుకుంటానని ఆయన స్పష్టం చేశారు. తాజా ఎన్నికల ఫలితాల ప్రకారం, ప్రతినిధుల సభతో పాటు సెనేట్‌లోనూ డెమోక్రటిక్ పార్టీ ఆధిక్యం సాధించినట్లు తెలుస్తోంది. ఈ నేపథ్యంలో రిపబ్లికన్ పార్టీలో ఓటమికి గల కారణాలపై ప్రస్తుతం అంతర్గత చర్చ తీవ్రస్థాయిలో మొదలైంది.
ఇరాన్ యుద్ధమే రిపబ్లికన్లను ముంచింది: అమెరికా ఉపాధ్యక్షుడు జేడీ వాన్స్ గతంలో మద్దతిచ్చిన ఓటర్లు డెమోక్రాట్లకు ఓటు వేయడం వల్లే ఓడామని విశ్లేషణ యుద్ధ నిర్ణయాన్ని సమర్థించుకున్న అధ్యక్షుడు డొనాల్డ్ ట్రంప్ సెనేట్, ప్రతినిధుల సభ రెండింటిలోనూ డెమోక్రాట్లకు ఆధిక్యం రిపబ్లికన్ పార్టీలో ఓటమిపై మొదలైన అంతర్గత చర్చ
RELATED ARTICLES
