క్యాన్సర్ను ముందుగానే గుర్తించేందుకు ఒకే రక్త నమూనాతో 50కి పైగా రకాల క్యాన్సర్లను గుర్తించగలుగుతామని చెబుతున్న గల్లెరి పరీక్షపై ఆసక్తి పెరుగుతోంది. ఈ పరీక్షను అభివృద్ధి చేసిన సంస్థ
వాదనల ప్రకారం.. లక్షణాలు కనిపించకముందే క్యాన్సర్‌కు సంబంధించిన సంకేతాలను గుర్తించవచ్చు. అయితే పరిశోధనల్లో ఈ పరీక్షకు కొన్ని పరిమితులు ఉన్నట్లు వెల్లడైంది. ముఖ్యంగా ప్రారంభ దశ
క్యాన్సర్లను గుర్తించడంలో ఇది అంత సమర్థవంతంగా లేదని, క్యాన్సర్ మరణాల ప్రమాదాన్ని తగ్గిస్తుందని ఇప్పటివరకు నిరూపితం కాలేదని నిపుణులు చెబుతున్నారు. అమెరికా ఆహార, ఔషధ నియంత్రణ
సంస్థ సలహా మండలి గ‌త సెప్టెంబర్‌ 23న ఈ పరీక్షకు అనుమతి ఇవ్వాలని సిఫారసు చేసింది. అయితే ఇది తుది అనుమతి కాదు. పరీక్షకు సంబంధించిన వివరాల్లో ప్రారంభ దశ క్యాన్సర్ గుర్తింపు అనే
పదాన్ని తొలగించాలని కూడా మండలి సభ్యులు సూచించారు.
గల్లెరి పరీక్ష అంటే ఏమిటి..?:
గల్లెరి పరీక్ష రక్తంలోని క్యాన్సర్ కణాల నుంచి విడుదలయ్యే డీఎన్‌ఏ ముక్కలను పరిశీలిస్తుంది. వాటిపై ఉండే ప్రత్యేకమైన మిథైలేషన్‌ గుర్తులను గుర్తించి, యంత్ర అభ్యాస పద్ధతుల ద్వారా క్యాన్సర్
సంకేతాలు ఉన్నాయా లేదా అని ఫలితం ఇస్తుంది. 50కి పైగా క్యాన్సర్లను గుర్తించే అవకాశం, క్యాన్సర్ ఏ అవయవం నుంచి మొదలై ఉంటుందో అంచనా వేయగలగడం దీని ప్రత్యేకతలు. ఒక అధ్యయనంలో
పరీక్ష చేయించుకున్న 32 వేల మందిలో 173 మందికి క్యాన్సర్ నిర్ధారణ కాగా, వారిలో 91 శాతం మందికి క్యాన్సర్ రకాన్ని ఈ పరీక్ష సరిగ్గా అంచనా వేసింది. తప్పుడు పాజిటివ్‌ ఫలితాలు కూడా
సుమారు 0.5 శాతమేనని పరిశోధకులు తెలిపారు. అయితే మూడు సంవత్సరాల పాటు పరీక్షించినప్పుడు అన్ని దశల్లోని క్యాన్సర్లను గుర్తించే సామర్థ్యం 31 శాతం కంటే తక్కువగా ఉంది. అంటే దాదాపు
69 శాతం కేసులను గుర్తించలేకపోయింది. ప్రారంభ దశ క్యాన్సర్లను గుర్తించే సామర్థ్యం కేవలం 21 శాతమే. అంటే దాదాపు 80 శాతం కేసులు తప్పిపోయాయి.
సభ్యుల మధ్య భిన్నాభిప్రాయాలు..: ఈ పరీక్ష వల్ల క్యాన్సర్ను ముందుగానే గుర్తించి మరణాల ప్రమాదాన్ని తగ్గించవచ్చని ఆశించినప్పటికీ, ఇప్పటివరకు అలాంటి ప్రయోజనం నిరూపితం కాలేదు. మూడు
సంవత్సరాల్లో ముదిరిన దశ క్యాన్సర్ల సంఖ్యను తగ్గించాలన్న పరిశోధన లక్ష్యాన్ని కూడా ఈ పరీక్ష చేరుకోలేకపోయింది. అమెరికా సలహా మండలి పరీక్ష సురక్షితమని ఏకగ్రీవంగా సిఫారసు చేసినప్పటికీ,
దాని ప్రభావంపై మాత్రం సభ్యుల మధ్య భిన్నాభిప్రాయాలు వ్యక్తమయ్యాయి. పాజిటివ్‌ ఫలితం వస్తే మరిన్ని పరీక్షలు, కొన్నిసార్లు బయాప్సీ చేయాల్సి వ‌స్తుంది. ఒక అధ్యయనంలో 0.6 శాతం మందికి
ఇన్వేసివ్‌ పరీక్షలు అవసరమయ్యాయి. పరీక్ష వల్ల కలిగే ప్రయోజనాలు, ప్రమాదాలపై ఇంకా స్పష్టత అవసరమని నిపుణులు అభిప్రాయపడ్డారు.
వైద్యుల‌తో చ‌ర్చించాలి..: ఈ పరీక్ష చేయించుకోవాలా వద్దా అనే విషయాన్ని వైద్యుడితో చర్చించిన తర్వాతే నిర్ణయించుకోవాలి. అమెరికాలో ప్రస్తుతం దీని ధర 949 డాలర్లు కాగా, ప్రభుత్వ ఆరోగ్య బీమా
లేదా ఇతర బీమా సంస్థలు ఖర్చును భరిస్తాయనే హామీ లేదు. తప్పుడు నెగెటివ్‌ ఫలితం వచ్చిందని క్యాన్సర్ లేదని పూర్తిగా నమ్మకూడదు. ముఖ్యంగా పెద్దపేగు, రొమ్ము, గర్భాశయ ముఖద్వారం,
ఊపిరితిత్తుల క్యాన్సర్ల కోసం ప్రస్తుతం సిఫారసు చేస్తున్న పరీక్షలను మాత్రం నిర్లక్ష్యం చేయకూడదు. ఇవి ప్రారంభ దశలో క్యాన్సర్ను గుర్తించడమే కాకుండా, క్యాన్సర్ వల్ల మరణించే ప్రమాదాన్ని తగ్గిస్తాయని
నిరూపితమైంది. కొత్త పరీక్షలపై ఆశలు పెట్టుకున్నప్పటికీ, నిరూపితమైన క్యాన్సర్ పరీక్షలను క్రమం తప్పకుండా చేయించుకోవడమే ముఖ్యమని నిపుణులు సూచిస్తున్నారు.
=======================
50 రకాల క్యాన్సర్లను ముందుగానే గుర్తించే కొత్త రక‌మైన పరీక్ష.. క్యాన్సర్ను ఎలా గుర్తిస్తుంది..?
RELATED ARTICLES
