నీటి కోసం గిరిజన విద్యార్థుల విలవిల.
కౌటగూడ పాఠశాలలో తాగునీటి సౌకర్యం లేక అవస్థలు.. ఇళ్ల నుంచే బాటిళ్లలో నీరు తెస్తున్న విద్యార్థులు.
అర్జున్ సమాచారం | అక్టోబర్ 5 | స్టాఫ్ రిపోర్టర్.
కొమురం భీం ఆసిఫాబాద్ జిల్లా: జిల్లాలోని ఆసిఫాబాద్ మండలంలోని గిరిజన ప్రాంతమైన కౌటగూడ పాఠశాలలో విద్యార్థులు తాగునీటి కోసం తీవ్ర ఇబ్బందులు ఎదుర్కొంటున్నారు. పాఠశాలలో సరైన నీటి సౌకర్యం లేకపోవడంతో విద్యార్థులు ఇళ్ల నుంచే బాటిళ్లలో నీటిని తీసుకురావాల్సిన పరిస్థితి నెలకొంది.
పాఠశాలలో తాగునీటికే కాకుండా మధ్యాహ్న భోజనం వండేందుకు, భోజనం అనంతరం ప్లేట్లు కడుక్కోవడానికి, మరుగుదొడ్లు వినియోగించేందుకు కూడా నీటి కొరత తీవ్రంగా ఉన్నట్లు విద్యార్థులు, తల్లిదండ్రులు చెబుతున్నారు. దీంతో విద్యార్థులు తీవ్ర ఇబ్బందులు పడుతున్నారని ఆవేదన వ్యక్తం చేస్తున్నారు.
విద్యార్థుల ఆరోగ్యం, పరిశుభ్రతకు తాగునీరు అత్యంత కీలకమైనప్పటికీ పాఠశాలలో కనీస నీటి వసతులు లేకపోవడంపై గ్రామస్తులు ఆందోళన వ్యక్తం చేస్తున్నారు. చిన్నారులు ప్రతిరోజూ నీటి కోసం ఇబ్బందులు పడాల్సిన పరిస్థితిని వెంటనే తొలగించాలని వారు కోరుతున్నారు.
విద్యార్థులకు కనీస తాగునీటి సౌకర్యాన్ని కల్పించడంతో పాటు పాఠశాలలో అవసరమైన నీటి వసతులను వెంటనే ఏర్పాటు చేయాలని విద్యార్థుల తల్లిదండ్రులు, గ్రామస్తులు సంబంధిత అధికారులను కోరుతున్నారు. ఉన్నతాధికారులు స్పందించి సమస్యను తక్షణమే పరిష్కరించి విద్యార్థులకు సురక్షితమైన తాగునీరు అందుబాటులోకి తీసుకురావాలని విజ్ఞప్తి చేస్తున్నారు.
