కరీంనగర్, రూరల్ జూలై 6,అర్జున్ సమాచారం:
కరీంనగర్ శాతవాహన అర్బన్ డెవలప్మెంట్ అథారిటీ (సుడా) ఛైర్మన్ పదవిపై రాజకీయ వర్గాల్లో ఉత్కంఠ నెలకొంది. ప్రస్తుత ఛైర్మన్ కోమటిరెడ్డి నరేందర్ రెడ్డి రెండేళ్ల పదవీకాలం ఈ నెల 8తో ముగియనున్న నేపథ్యంలో తదుపరి ఛైర్మన్గా ఎవరికి అవకాశం దక్కనుందన్న అంశంపై జిల్లా రాజకీయాల్లో ఆసక్తికర చర్చ సాగుతోంది. ప్రస్తుత ఛైర్మన్కే మరోసారి అవకాశం కల్పిస్తారా? లేక కొత్త నాయకుడికి బాధ్యతలు అప్పగిస్తారా? అన్న అంశంపై కాంగ్రెస్ శ్రేణుల్లో విస్తృతంగా చర్చ జరుగుతోంది.
సుడా ఛైర్మన్ పదవి జిల్లా రాజకీయాల్లో ప్రతిష్ఠాత్మకమైనదిగా పరిగణించబడుతోంది. పట్టణ అభివృద్ధి, మాస్టర్ ప్లాన్ అమలు, కొత్త లేఅవుట్ల అనుమతులు, మౌలిక వసతుల విస్తరణ, నగర పరిధి అభివృద్ధి వంటి కీలక అంశాల్లో సుడా కీలక పాత్ర పోషిస్తుంది. దీంతో ఈ పదవిని దక్కించుకునేందుకు పలువురు కాంగ్రెస్ నాయకులు ఆసక్తి చూపుతున్నట్లు సమాచారం.
ప్రస్తుత ఛైర్మన్ కోమటిరెడ్డి నరేందర్ రెడ్డి పనితీరుపై ప్రభుత్వం సానుకూలంగా ఉందన్న ప్రచారం ఒకవైపు సాగుతుండగా, పార్టీ కోసం కష్టపడి పనిచేసిన నాయకులకు అవకాశం కల్పించాలని మరో వర్గం అధిష్ఠానాన్ని కోరుతున్నట్లు తెలుస్తోంది. దీంతో పదవి కోసం తెర వెనుక రాజకీయ ప్రయత్నాలు ముమ్మరమైనట్లు పార్టీ వర్గాలు చెబుతున్నాయి.
జిల్లాలో సామాజిక సమీకరణాలు, పార్టీ బలోపేతం, నాయకుల సేవలు, భవిష్యత్ రాజకీయ పరిస్థితులు, రానున్న స్థానిక సంస్థల ఎన్నికలను దృష్టిలో ఉంచుకుని ప్రభుత్వం నిర్ణయం తీసుకునే అవకాశం ఉందని రాజకీయ విశ్లేషకులు అభిప్రాయపడుతున్నారు. అదే సమయంలో జిల్లా కాంగ్రెస్లో అన్ని వర్గాలకు సముచిత ప్రాధాన్యం కల్పించే దిశగా కూడా అధిష్ఠానం ఆలోచిస్తున్నట్లు సమాచారం.
ఇప్పటికే ఆశావహులు రాష్ట్ర నాయకత్వంతో సంప్రదింపులు జరుపుతున్నట్లు ప్రచారం జరుగుతోంది. కొందరు ప్రజాప్రతినిధుల ద్వారా తమ పేర్లను పరిశీలించాలని కోరుతుండగా, మరికొందరు పార్టీ సీనియర్ నేతల మద్దతు కూడగట్టే ప్రయత్నాలు చేస్తున్నట్లు తెలుస్తోంది.
అయితే సుడా ఛైర్మన్ నియామకంపై ప్రభుత్వం నుంచి ఇప్పటివరకు ఎలాంటి అధికారిక ప్రకటన వెలువడలేదు. ముఖ్యమంత్రి, పార్టీ రాష్ట్ర నాయకత్వం ఆమోదంతో త్వరలోనే తుది నిర్ణయం వెలువడే అవకాశం ఉందని కాంగ్రెస్ వర్గాలు పేర్కొంటున్నాయి. అప్పటి వరకు ప్రస్తుత ఛైర్మన్కు పదవీకాల పొడిగింపు లభిస్తుందా? లేక కొత్త నాయకుడికి అవకాశం దక్కుతుందా? అన్నది జిల్లాలో రాజకీయ చర్చకు కేంద్రబిందువుగా మారింది.
============================
సుడా ఛైర్మన్ పదవిపై ఉత్కంఠ కొనసాగింపా.. కొత్త ముఖానికా..? తెర వెనుక ముమ్మర ప్రయత్నాలు.. అధిష్ఠానం నిర్ణయంపై సర్వత్రా ఆసక్తి
