వెంకటాపూర్‌ సబ్‌స్టేషన్‌లో 8 ఎంవీఏ ట్రాన్స్‌ఫార్మర్‌ ప్రారంభం,పెరుగుతున్న విద్యుత్‌ డిమాండ్‌కు అనుగుణంగా సామర్థ్యం పెంపు.
ఓవర్‌లోడ్‌ సమస్యలకు చెక్‌.. వినియోగదారులకు మెరుగైన విద్యుత్‌ సరఫరా,
అర్జున్ సమాచారం // అక్టోబర్ 15 // మంథని డెస్క్:
మంథని డివిజన్‌ పరిధిలోని వెంకటాపూర్‌ గ్రామ 33/11 కేవీ విద్యుత్‌ సబ్‌స్టేషన్‌లో ట్రాన్స్‌ఫార్మర్‌ సామర్థ్యాన్ని 5 ఎంవీఏ నుంచి 8 ఎంవీఏకు పెంచారు. ఈ మేరకు గురువారం నూతన సామర్థ్యంతో ట్రాన్స్‌ఫార్మర్‌ను విజయవంతంగా ఛార్జింగ్‌ చేసినట్లు మంథని డీఈ వి. ప్రభాకర్‌ తెలిపారు.
పెరుగుతున్న విద్యుత్‌ లోడ్‌కు పరిష్కారం
మంథని సబ్‌డివిజన్‌ పరిధిలోని ఏక్లాస్‌పూర్‌ ఆపరేషన్‌ సెక్షన్‌ కింద ఉన్న వెంకటాపూర్‌ సబ్‌స్టేషన్‌లో ట్రాన్స్‌ఫార్మర్‌ సామర్థ్యాన్ని పెంచడం ద్వారా పెరుగుతున్న విద్యుత్‌ డిమాండ్‌కు అనుగుణంగా సరఫరా అందించేందుకు అవకాశం కలుగుతుందని డీఈ వివరించారు. ఈ చర్యతో ట్రాన్స్‌ఫార్మర్‌పై అధిక భారం తగ్గడంతో పాటు ఓవర్‌లోడ్‌ సమస్యలను నియంత్రించవచ్చని పేర్కొన్నారు.
సామర్థ్య పెంపుతో పరిసర ప్రాంతాల విద్యుత్‌ వినియోగదారులకు మెరుగైన, నాణ్యమైన, నమ్మకమైన విద్యుత్‌ సరఫరా అందించేందుకు వీలవుతుందని తెలిపారు. ముఖ్యంగా విద్యుత్‌ వినియోగం పెరుగుతున్న నేపథ్యంలో సరఫరా వ్యవస్థను బలోపేతం చేయడం ద్వారా అంతరాయాలను తగ్గించేందుకు అవకాశం ఉంటుందని పేర్కొన్నారు.
విద్యుత్‌ శాఖ అధికారుల సమక్షంలో ఛార్జింగ్‌
ట్రాన్స్‌ఫార్మర్‌ సామర్థ్య పెంపు, ఛార్జింగ్‌ ప్రక్రియను విద్యుత్‌ శాఖ అధికారులు పర్యవేక్షించారు. ఈ కార్యక్రమంలో మంథని ఏడీఈ ఆపరేషన్‌, పెద్దపల్లి ఏడీ ట్రాన్స్‌ఫార్మర్స్‌, ఏక్లాస్‌పూర్‌ ఏఈ ఆపరేషన్‌, పెద్దపల్లి ఏఈ ట్రాన్స్‌ఫార్మర్స్‌తో పాటు సంబంధిత విద్యుత్‌ శాఖ సిబ్బంది పాల్గొన్నారు.
