అడ్డా కార్మికులకు ప్రత్యేక స్థలం కేటాయించి మౌలిక సదుపాయాలు కల్పించాలి.ఎంపీకి వినతిపత్రం అందజేసిన HMS జిల్లా అధ్యక్షులు నరెడ్ల శ్రీనివాస్.
మంచిర్యాల;అర్జున్ సమాచారం ప్రతినిధిసెప్టెంబర్ 19.
మంచిర్యాల పట్టణంలో రోడ్ల పక్కన నిలబడి ఉపాధి కోసం ఎదురుచూస్తున్న అడ్డా కార్మికులకు శాశ్వత ప్రత్యేక స్థలం కేటాయించి, షెడ్లు, తాగునీరు, మరుగుదొడ్లు తదితర మౌలిక సదుపాయాలు కల్పించాలని హింద్ మజ్దూర్ సభ (HMS) మంచిర్యాల జిల్లా కమిటీ డిమాండ్ చేసింది.
ఈ మేరకు పెద్దపల్లి పార్లమెంట్ నియోజకవర్గ ఎంపీ గారికి HMS జిల్లా అధ్యక్షులు నరెడ్ల శ్రీనివాస్ వినతిపత్రం సమర్పించారు.
ఈ సందర్భంగా నరెడ్ల శ్రీనివాస్ మాట్లాడుతూ, మంచిర్యాల పట్టణంలో వందలాది మంది భవన నిర్మాణ కార్మికులు, దినసరి కూలీలు, అసంఘటిత రంగ కార్మికులు ప్రతిరోజూ ఓవర్ బ్రిడ్జి ఏరియా, ముక్రం చౌరస్తా తదితర ప్రాంతాల్లో రోడ్ల పక్కన నిలబడి పనుల కోసం వేచి ఉండాల్సిన పరిస్థితి ఉందన్నారు.
అడ్డా కార్మికులకు ప్రత్యేక స్థలం లేకపోవడంతో ఎండ, వర్షం, ట్రాఫిక్ మధ్య తీవ్ర ఇబ్బందులు ఎదుర్కొంటున్నారని, రద్దీ ప్రాంతాల్లో నిలబడటం వల్ల కార్మికుల భద్రతకు కూడా ముప్పు ఏర్పడుతోందని తెలిపారు. అదే సమయంలో ప్రజలు, వాహనదారులకు కూడా ఇబ్బందులు కలుగుతున్నాయని పేర్కొన్నారు.
అడ్డా కార్మికులకు సురక్షితమైన, గౌరవప్రదమైన వాతావరణంలో ఉపాధి కోసం వేచి ఉండే అవకాశం కల్పించడం ప్రభుత్వాల బాధ్యత అని నరెడ్ల శ్రీనివాస్ అన్నారు.
అడ్డా కార్మికుల కోసం శాశ్వత స్థలం కేటాయించడంతో పాటు అక్కడ ఎండ, వర్షం నుంచి రక్షణ కల్పించే షెడ్లు, స్వచ్ఛమైన తాగునీరు, మహిళా–పురుషులకు ప్రత్యేక మరుగుదొడ్లు, విద్యుత్ దీపాలు, బెంచీలు, ఫ్యాన్లు వంటి కనీస మౌలిక వసతులు ఏర్పాటు చేయాలని కోరారు.
అలాగే కార్మికుల భద్రతకు, ప్రజలు మరియు వాహనాల రాకపోకలకు ఇబ్బంది కలగకుండా అడ్డా ప్రాంతాన్ని అభివృద్ధి చేయాలని, అడ్డా కార్మికులను ఈ-శ్రమ, కార్మిక సంక్షేమ బోర్డులు, కేంద్ర ప్రభుత్వ అసంఘటిత కార్మిక సంక్షేమ పథకాలతో అనుసంధానం చేసేందుకు ప్రత్యేక నమోదు శిబిరాలు నిర్వహించాలని విజ్ఞప్తి చేశారు.
ఈ సమస్యపై కేంద్ర, రాష్ట్ర కార్మిక శాఖలు, జిల్లా యంత్రాంగం, మంచిర్యాల మున్సిపల్ కార్పొరేషన్ అధికారులతో సమన్వయ సమావేశం ఏర్పాటు చేసి శాశ్వత పరిష్కారం చూపించేందుకు ఎంపీ ప్రత్యేక చొరవ తీసుకోవాలని HMS తరఫున కోరారు.
“అడ్డా కార్మికులకు కేవలం స్థలం కాదు—గౌరవంగా నిలబడి ఉపాధి పొందే హక్కు కల్పించాలి” అనే లక్ష్యంతో HMS కార్మికుల సమస్యలపై నిరంతరం పోరాడుతుందని నరెడ్ల శ్రీనివాస్ తెలిపారు.
ఈ కార్యక్రమంలో హెచ్ ఎం ఎస్ జిల్లా ఉపాధ్యక్షుడు ఎండి షఫీ
హెచ్ఎంఎస్ మంచిర్యాల సిటీ అధ్యక్షులు ఎండి హుస్సేన్
హెచ్ఎంఎస్ జిల్లా కార్యదర్శి తగురం శ్రీనివాస్. హెచ్ ఎం ఎస్ నాయకులు పల్లపు శ్రీనివాస్ తదితరులు పాల్గొన్నారు
