ePaper
Friday, November 20, 2026
ePaper
Homeక్రైమ్ న్యూస్పోలీసుల ఎన్‌కౌంటర్‌లో డి-కంపెనీ గ్యాంగ్‌స్టర్ హతం,

పోలీసుల ఎన్‌కౌంటర్‌లో డి-కంపెనీ గ్యాంగ్‌స్టర్ హతం,

📰 Generate e-Paper Clip

పోలీసుల ఎన్‌కౌంటర్‌లో డి-కంపెనీ గ్యాంగ్‌స్టర్ హతం,

ఢిల్లీ : అర్జున్ సమాచారం డెస్క్ నవంబర్ 20.

అండర్‌వరల్డ్ డాన్ దావూద్ ఇబ్రహీం నేతృత్వంలోని డి-కంపెనీతో సంబంధాలున్న గ్యాంగ్‌స్టర్ నసీమ్ దుర్రానీ పోలీసుల ఎన్‌కౌంటర్‌లో హతమయ్యాడు. ఢిల్లీ న్యాయశాఖ మంత్రి కపిల్ మిశ్రా కార్యాలయం సమీపంలో ఇటీవల జరిగిన ఓ హత్య కేసులో దుర్రానీ ప్రధాన నిందితుడు. శుక్రవారం తెల్లవారుజామున ఉత్తరప్రదేశ్‌లోని బులంద్‌షహర్ జిల్లాలో ఈ ఎన్‌కౌంటర్ జరిగింది. ఢిల్లీ క్రైమ్ బ్రాంచ్, నోయిడా స్పెషల్ టాస్క్ ఫోర్స్ పోలీసులు సంయుక్తంగా ఈ ఆపరేషన్ చేపట్టారు. నసీమ్ కదలికలపై నిఘా వర్గాల నుంచి సమాచారం అందడంతో సికంద్రాబాద్ బైపాస్ వద్ద అతడిని పట్టుకునేందుకు ప్రయత్నించారు. సీసీటీవీ ఫుటేజీలో స్కూటర్‌పై వెళ్తున్నట్లు గుర్తించారు. పోలీసులు చుట్టుముట్టడంతో పారిపోయేందుకు యత్నించి, స్కూటర్ అదుపుతప్పి కిందపడిపోయాడు. తన వద్ద ఉన్న రెండు .32 బోర్ పిస్టళ్లతో పోలీసులపై కాల్పులు జరిపాడు. ఆత్మరక్షణ కోసం పోలీసులు జరిపిన ఎదురుకాల్పుల్లో నసీమ్‌కు తీవ్ర గాయాలయ్యాయి. ఆసుపత్రికి తరలించగా, అప్పటికే మృతి చెందినట్లు వైద్యులు నిర్ధారించారు. ఘటనా స్థలం నుంచి రెండు పిస్టళ్లను స్వాధీనం చేసుకున్నారు. ఈ నెల 16న ఈశాన్య ఢిల్లీలోని ఖజూరీ ఖాస్ ప్రాంతంలో సమీర్ (26) అనే యువకుడిని నసీమ్ కాల్చి చంపినట్లు ఆరోపణలున్నాయి. ఢిల్లీ మంత్రి కపిల్ మిశ్రా క్యాంపు ఆఫీసు బయట జరిగిన ఈ ఘటనలో సమీర్‌పై దాదాపు 15 నుంచి 20 రౌండ్లు కాల్పులు జరిపారు. ఆటో రిక్షా ఆపరేటర్లు, స్క్రాప్ డీలర్ల నుంచి వసూళ్లకు సంబంధించిన గ్యాంగ్ వార్ కారణంగానే ఈ హత్య జరిగినట్లు పోలీసులు భావిస్తున్నారు. రిజ్వాన్ అనే మరో పేరున్న నసీమ్‌పై రూ. 50,000 రివార్డు ఉంది. అతడిపై హత్య, హత్యాయత్నం, దోపిడీ వంటి 25కు పైగా క్రిమినల్ కేసులు ఉన్నాయి. అండర్‌వరల్డ్ డాన్ దావూద్ ముఖ్య అనుచరుడైన ఛోటా షకీల్‌తో నసీమ్‌కు సంబంధాలున్నట్లు పోలీసులు తెలిపారు. 2016-17లో తీహార్ జైలులో ఉన్న గ్యాంగ్‌స్టర్ ఛోటా రాజన్‌ను హత్య చేసేందుకు షకీల్ నుంచి నసీమ్ సుపారీ తీసుకున్నట్లు దర్యాప్తులో తేలింది. అలాగే, పాకిస్థానీ-కెనడియన్ జర్నలిస్ట్ తారెక్ ఫతా హత్యకు పన్నిన కుట్రలో కూడా అతడి ప్రమేయం ఉన్నట్లు ఆరోపణలున్నాయి. నేర ప్రపంచంలో ఉంటూనే సోషల్ మీడియాలో నసీమ్ తనను తాను ప్రొజెక్ట్ చేసుకునేవాడు.

RELATED ARTICLES

Most Popular

- Advertisment -
App Icon

Install AS News App

Add to home screen for faster loading and latest updates.

error: Content is protected !!