మంచిర్యాలలో తొలి జాతీయ స్థాయి జంగిల్ సఫారీ ఫారెస్ట్ మారథాన్ ప్రారంభం
మంచిర్యాల:అ ర్జున్ సమాచారం ప్రతినిధి అక్టోబరు 11.
అటవీ పరిరక్షణ, పర్యావరణ పర్యాటక అభివృద్ధికి మారథాన్ దోహదం
మంచిర్యాల అటవీ శాఖ, గ్రీన్‌సెక్యూర్ ఫౌండేషన్ సంయుక్త ఆధ్వర్యంలో నిర్వహించిన తొలి జాతీయ స్థాయి ‘జంగిల్ సఫారీ ఫారెస్ట్ మారథాన్’ను మంచిర్యాల శాసనసభ్యులు కొక్కిరాల ప్రేమ్‌సాగర్ రావు ప్రారంభించారు. ప్రకృతి అందాలు, అటవీ సంపద, జీవవైవిధ్య పరిరక్షణపై ప్రజల్లో అవగాహన కల్పించడంతో పాటు పర్యావరణ పర్యాటకాన్ని ప్రోత్సహించడమే ఈ కార్యక్రమ ప్రధాన ఉద్దేశమని నిర్వాహకులు తెలిపారు.
గ్రీన్‌సెక్యూర్ ట్రైల్ రన్ పేరుతో నిర్వహించిన ఈ మారథాన్ ద్వారా మంచిర్యాల అటవీ ప్రాంతంలోని సహజ సౌందర్యాన్ని దేశవ్యాప్తంగా, అంతర్జాతీయ స్థాయిలో పరిచయం చేయడానికి ప్రయత్నించారు. అడవుల సంరక్షణ, జీవవైవిధ్య పరిరక్షణ ప్రాముఖ్యతను ప్రజలకు తెలియజేయడంతో పాటు పర్యాటక రంగ అభివృద్ధికి ఈ కార్యక్రమం దోహదపడనుంది.
దట్టమైన అడవులు, పచ్చికభూములు, క్వారీ సరస్సుల పరిసరాలతో పాటు చారిత్రక గాంధారి ఖిల్లా మీదుగా మారథాన్ మార్గాన్ని ఏర్పాటు చేశారు. ఈ మార్గం ద్వారా మంచిర్యాల ప్రాంతంలోని ప్రకృతి అందాలు, చారిత్రక వారసత్వాన్ని రన్నర్లకు పరిచయం చేసే అవకాశం కల్పించారు.
ఒక రన్నర్‌–ఒక మొక్క నినాదంతో పర్యావరణ పరిరక్షణకు ప్రాధాన్యతనిచ్చారు. మారథాన్‌లో పాల్గొన్న ప్రతి ఒక్కరి గౌరవార్థం మందమర్రి మండలం బొక్కలగుట్ట సమీపంలోని గాంధారి వనంలో అటవీ శాఖ ఆధ్వర్యంలో మొక్కలు నాటారు. పర్యావరణ పునరుద్ధరణ, పచ్చదనం పెంపునకు ప్రతి ఒక్కరూ తమ వంతు బాధ్యతగా మొక్కలు నాటాలని ఈ కార్యక్రమం సందేశాన్నిచ్చింది.
ప్రజల్లో శారీరక దృఢత్వం, ఆరోగ్యకరమైన జీవనశైలిని ప్రోత్సహించే లక్ష్యంతో 5 కిలోమీటర్లు, 10 కిలోమీటర్లు, 30 కిలోమీటర్ల విభాగాల్లో ఈ అటవీ మారథాన్‌ను నిర్వహించారు. దేశంలోని వివిధ రాష్ట్రాల నుంచి వచ్చిన రన్నర్లతో పాటు విదేశీ రన్నర్లు కూడా ఈ పరుగులో పాల్గొని కార్యక్రమాన్ని విజయవంతం చేశారు.
ప్రకృతి పరిరక్షణ, అటవీ సంపద సంరక్షణ, పర్యావరణ పర్యాటక అభివృద్ధి, ఆరోగ్యకరమైన జీవనశైలి వంటి అంశాలను ఒకే వేదికపైకి తీసుకొచ్చిన ఈ మారథాన్ మంచిర్యాల ప్రాంత ప్రత్యేకతలను విస్తృతంగా పరిచయం చేసే కార్యక్రమంగా నిలిచింది.
ఆవునూరి రాజ్ కుమార్ బి.ఎడ్., బి.కాం., డి.ఎడ్.
