మంచిర్యాల జిల్లాను. సంపూర్ణ అక్షరాస్యత దిశగా తీర్చిదిద్దాలి.
న్యూఢిల్లీలో, తెలంగాణ ప్రతిభకు గుర్తింపు.. ఉల్లాస్ మేళాలో పాల్గొన్న ప్రతినిధులకు, కలెక్టర్ కుమార్ దీపక్ అభినందనలు.
అర్జున్ సమాచారం. అక్టోబర్ 26. (స్టాఫ్ రిపోర్టర్) మంచిర్యాల జిల్లా.
మంచిర్యాల జిల్లాను సంపూర్ణ అక్షరాస్యత సాధించిన జిల్లాగా తీర్చిదిద్దేందుకు ప్రతి ఒక్కరూ సమష్టిగా కృషి చేయాలని జిల్లా కలెక్టర్ కుమార్ దీపక్ పిలుపునిచ్చారు. అక్షరాస్యత సాధనలో తెలంగాణ రాష్ట్రానికి గుర్తింపు తీసుకువచ్చిన కాసిపేట మండల ప్రతినిధులను ఆయన అభినందించారు. న్యూఢిల్లీలో సెప్టెంబరు 8 నుంచి 10వ తేదీ వరకు నిర్వహించిన అంతర్జాతీయ అక్షరాస్యత దినోత్సవం, ఉల్లాస్ మేళా కార్యక్రమాల్లో తెలంగాణ రాష్ట్రం తరఫున పాల్గొని తమ సేవలను చాటినందుకు ప్రశంసలు తెలిపారు.
కాసిపేట మండలంలో వంద శాతం అక్షరాస్యత సాధించాలనే లక్ష్యంతో కృషి చేసిన స్వచ్ఛంద ఉపాధ్యాయులు, నూతన అక్షరాస్యులు, జిల్లా వనరుల వ్యక్తి బండ శాంకరీ ఈ కార్యక్రమాల్లో పాల్గొన్నారు. వీరితో పాటు గతంలో మంచిర్యాల జిల్లా వయోజన విద్యాశాఖ ప్రాజెక్టు అధికారిగా పనిచేసి, ప్రస్తుతం నిజామాబాద్ జిల్లా వయోజన విద్యాశాఖ ఉప సంచాలకులుగా విధులు నిర్వహిస్తున్న ఏ. పురుషోత్తం కూడా న్యూఢిల్లీలో జరిగిన కార్యక్రమానికి హాజరయ్యారు.
భారత ప్రభుత్వ విద్యాశాఖలోని పాఠశాల విద్య, అక్షరాస్యత విభాగం ఆధ్వర్యంలో నిర్వహించిన ఈ కార్యక్రమాలు అక్షరాస్యత ప్రాధాన్యాన్ని చాటిచెప్పే వేదికలుగా నిలిచాయి. దేశవ్యాప్తంగా అక్షరాస్యత సాధనకు చేపడుతున్న కార్యక్రమాలు, ప్రజల్లో చదవడం, రాయడం పట్ల అవగాహన పెంపొందించాల్సిన అవసరం వంటి అంశాలకు ఈ వేడుకల్లో ప్రాధాన్యం కల్పించారు. ఈ కార్యక్రమాల్లో తెలంగాణ రాష్ట్రం తరఫున పాల్గొన్న మంచిర్యాల జిల్లా, ప్రతినిధులు తమ అనుభవాలను, సేవలను చాటడం జిల్లాకు గుర్తింపు తీసుకువచ్చే అంశంగా నిలిచింది.
కాసిపేట మండలంలో అక్షరాస్యత పెంపొందించేందుకు స్వచ్ఛంద ఉపాధ్యాయులు చేసిన కృషి అభినందనీయమని కలెక్టర్ కుమార్ దీపక్ పేర్కొన్నారు. చదవడం, రాయడం నేర్చుకోవడం ప్రతి వ్యక్తికి అవసరమని, అక్షరాస్యత ద్వారా వ్యక్తిగత అభివృద్ధితో పాటు సామాజిక పురోగతికి కూడా అవకాశాలు మెరుగుపడతాయని తెలిపారు. ముఖ్యంగా చదువుకు దూరంగా ఉన్నవారిని గుర్తించి, వారికి అక్షర జ్ఞానం, అందించేందుకు సంబంధిత వర్గాలు నిరంతరం కృషి చేయాలని సూచించారు.
అక్షరాస్యత కార్యక్రమాలను ప్రజల్లోకి విస్తృతంగా తీసుకెళ్లడం ద్వారా మరింత మందికి విద్యను చేరువ చేయవచ్చని ఆయన పేర్కొన్నారు. స్వచ్ఛంద ఉపాధ్యాయులు, విద్యాశాఖ సిబ్బంది, స్థానిక ప్రతినిధులు సమన్వయంతో పనిచేస్తే లక్ష్య సాధన సులభమవుతుందని తెలిపారు. అక్షరాస్యత సాధన అనేది ఒక్క శాఖకు మాత్రమే పరిమితమైన బాధ్యత కాదని, సమాజంలోని ప్రతి ఒక్కరూ భాగస్వాములు కావాలని పిలుపునిచ్చారు.
న్యూఢిల్లీలో నిర్వహించిన అంతర్జాతీయ అక్షరాస్యత దినోత్సవం, ఉల్లాస్ మేళాలో పాల్గొన్న ప్రతినిధుల అనుభవాలను జిల్లాలో అక్షరాస్యత కార్యక్రమాల బలోపేతానికి ఉపయోగించుకోవాలని కలెక్టర్ సూచించారు. ఇదే స్ఫూర్తితో మంచిర్యాల జిల్లాలో అక్షరాస్యత సాధనకు కృషి చేస్తూ, ప్రతి ఒక్కరికీ చదవడం, రాయడం నేర్పించే దిశగా ముందుకు సాగాలని కోరారు. సమష్టి కృషితో మంచిర్యాల జిల్లాను వంద శాతం అక్షరాస్యత కలిగిన జిల్లాగా తీర్చిదిద్దాలని ఆయన పిలుపునిచ్చారు.
