గోదావరి పుష్కర ఘాట్ ఏర్పాట్లపై, ఎమ్మెల్యే ప్రేమ్ సాగర్ రావు ప్రత్యేక పర్యవేక్షణ.
లక్షెట్టిపేటలో పుష్కర ఘాట్ పనుల పరిశీలన…..భక్తులకు ఇబ్బందులు కలగకుండా అన్ని సౌకర్యాలు కల్పించాలని అధికారులకు సూచన,
మంచిర్యాల: అర్జున్ సమాచారం డెస్క్ నవంబర్ 8.
రానున్న గోదావరి పుష్కరాలను దృష్టిలో ఉంచుకొని భక్తులకు మెరుగైన సౌకర్యాలు కల్పించేందుకు ముందస్తు ఏర్పాట్లు చేపట్టాలని మంచిర్యాల ఎమ్మెల్యే కొక్కిరాల ప్రేమ్ సాగర్ రావు అధికారులకు సూచించారు. ఈ క్రమంలో లక్షెట్టిపేట మున్సిపాలిటీ పరిధిలోని గోదావరి నది వద్ద ఏర్పాటు చేయనున్న పుష్కర ఘాట్‌ను సంబంధిత అధికారులతో కలిసి ఆయన క్షేత్రస్థాయిలో పరిశీలించారు. పుష్కర ఘాట్ ఏర్పాట్ల పురోగతిని సమీక్షించి, చేపట్టాల్సిన పనులపై అధికారులకు పలు సూచనలు చేశారు.
ఈ సందర్భంగా ఎమ్మెల్యే మాట్లాడుతూ పుష్కరాలకు వచ్చే భక్తులకు ఎలాంటి ఇబ్బందులు కలగకుండా అన్ని శాఖల అధికారులు సమన్వయంతో పనిచేయాలని సూచించారు. ముఖ్యంగా పుష్కర ఘాట్ వద్ద అవసరమైన మౌలిక సదుపాయాలు కల్పించడంతో పాటు భద్రతా ఏర్పాట్లకు ప్రాధాన్యత ఇవ్వాలని తెలిపారు. భక్తుల రాకపోకలకు అనుకూలమైన వాతావరణం ఉండేలా ముందస్తు చర్యలు తీసుకోవాలని పేర్కొన్నారు.
అదేవిధంగా ఘాట్ పరిసరాల్లో పారిశుధ్య నిర్వహణ, తాగునీటి సరఫరా, ఇతర అవసరమైన సౌకర్యాల కల్పనపై ప్రత్యేక దృష్టి సారించాలని అధికారులకు సూచించారు. పుష్కరాల సమయంలో పెద్ద సంఖ్యలో భక్తులు గోదావరి నదికి వచ్చే అవకాశం ఉన్నందున ఎలాంటి సమస్యలు తలెత్తకుండా ఇప్పటి నుంచే ప్రణాళికాబద్ధంగా ఏర్పాట్లు పూర్తి చేయాలని అన్నారు. భక్తులకు సౌకర్యవంతమైన, సురక్షితమైన వాతావరణం కల్పించడమే లక్ష్యంగా అన్ని విభాగాలు బాధ్యతాయుతంగా వ్యవహరించాలని ఆదేశించారు.
ఈ పరిశీలన కార్యక్రమంలో మంచిర్యాల జిల్లా ఆర్టీఏ సభ్యుడు అంకతి శ్రీనివాస్, చైర్మన్ దొంత అంజలి-నర్సయ్య, వైస్ చైర్మన్ మోత్కూరు రాజేశ్వరి-వెంకటస్వామి గౌడ్, సింగిల్ విండో చైర్మన్లు చల్లా నాగభూషణం, ముత్యాల శ్రీనివాస్, దేవేందర్ రెడ్డి, లక్షెట్టిపేట పట్టణ అధ్యక్షుడు సయ్యద్ షాహిద్ అలీ, లక్షెట్టిపేట మండల అధ్యక్షుడు, సర్పంచ్ నలిమెల రాజు పాల్గొన్నారు.
వీరితో పాటు కౌన్సిలర్లు, సర్పంచులు, ఉపసర్పంచులు, వార్డు సభ్యులు, మార్కెట్ కమిటీ డైరెక్టర్లు, సింగిల్ విండో డైరెక్టర్లు, కాంగ్రెస్ పార్టీ నాయకులు, కార్యకర్తలు, సంబంధిత శాఖల అధికారులు పాల్గొన్నారు.
