ప్రభుత్వ పాఠశాల విద్యార్థులకు పౌష్టికాహారం అందించడమే తెలంగాణ అల్పాహార కార్యక్రమం లక్ష్యం.
అర్జున్ సమాచారం అక్టోబర్ 9 బెల్లంపల్లి నియోజకవర్గ ప్రతినిధి.
ప్రభుత్వ బడుల్లో విద్యార్థుల ఆరోగ్యం, విద్యాభివృద్ధికి ప్రత్యేక ప్రాధాన్యత,
మంచిర్యాల జిల్లా బెల్లంపల్లి ఎమ్మెల్యే గడ్డం వినోద్ వెంకటస్వామి చేతుల మీదుగా తెలంగాణ అల్పాహార కార్యక్రమం ప్రారంభం.
ప్రభుత్వ పాఠశాలల్లో విద్యనభ్యసిస్తున్న పేద విద్యార్థులు ఉదయం పూట ఆకలితో ఇబ్బందులు పడకుండా, పౌష్టికాహారం తీసుకుంటూ ఆరోగ్యంగా ఎదిగి చదువులో రాణించాలనే లక్ష్యంతో తెలంగాణ రాష్ట్ర ప్రభుత్వం ప్రతిష్టాత్మకంగా చేపట్టిన తెలంగాణ అల్పాహార కార్యక్రమాన్ని బెల్లంపల్లి పట్టణంలోని జిల్లా పరిషత్ బాలికల ఉన్నత పాఠశాలలో బెల్లంపల్లి శాసనసభ్యులు గడ్డం వినోద్ వెంకటస్వామి ప్రారంభించారు.
హరే రామ హరే కృష్ణ ఫౌండేషన్ భాగస్వామ్యంతో నిర్వహిస్తున్న ఈ కార్యక్రమం ద్వారా ప్రభుత్వ పాఠశాలల విద్యార్థులకు ఉదయం పూట అల్పాహారం అందించనున్నారు.
ఈ సందర్భంగా ఎమ్మెల్యే గడ్డం వినోద్ వెంకటస్వామి మాట్లాడుతూ,
విద్యార్థుల ఆరోగ్యం, విద్యాభివృద్ధి, ఉజ్వల భవిష్యత్తును దృష్టిలో ఉంచుకుని రాష్ట్ర ప్రభుత్వం ఈ కార్యక్రమాన్ని ప్రారంభించడం అభినందనీయమని తెలిపారు. గ్రామీణ, పట్టణ ప్రాంతాల్లో అనేకమంది తల్లిదండ్రులు ఉదయాన్నే తమ పనులకు వెళ్లే పరిస్థితుల్లో పాఠశాలలకు వచ్చే పిల్లలకు ఉదయం పూట అల్పాహారం అందించడం ఎంతో ఉపయోగకరమని పేర్కొన్నారు.
విద్యార్థులు ఆకలిని మరిచి చదువుపై పూర్తి శ్రద్ధ పెట్టేలా, పౌష్టికాహారం ద్వారా ఆరోగ్యంగా ఉండేలా ఈ కార్యక్రమం దోహదపడుతుందని తెలిపారు. విద్య అనేది ప్రతి విద్యార్థి జీవితాన్ని మార్చే గొప్ప ఆయుధమని, పేదరికం కారణంగా ఏ విద్యార్థి కూడా విద్యకు దూరం కాకూడదన్నదే ప్రభుత్వ లక్ష్యమని పేర్కొన్నారు.
ప్రభుత్వ పాఠశాలల బలోపేతానికి ప్రత్యేక ప్రాధాన్యత
ప్రభుత్వ పాఠశాలల్లో మెరుగైన విద్యాబోధనతో పాటు అవసరమైన మౌలిక సదుపాయాలు కల్పించేందుకు ప్రభుత్వం కృషి చేస్తోందని ఎమ్మెల్యే తెలిపారు. విద్యార్థులు, ఉపాధ్యాయులు ప్రభుత్వ పాఠశాలల్లో అందుబాటులో ఉన్న సదుపాయాలను సద్వినియోగం చేసుకోవాలని సూచించారు. తల్లిదండ్రులు తమ పిల్లలను ప్రభుత్వ పాఠశాలల్లో చేర్పించి, వారికి నాణ్యమైన విద్య అందేలా ప్రోత్సహించాలని కోరారు.
విద్యార్థులు క్రమశిక్షణతో చదువుకుని ఉన్నత లక్ష్యాలను సాధించాలని, భవిష్యత్తులో తమ కుటుంబాలకు, బెల్లంపల్లి ప్రాంతానికి మంచి పేరు తీసుకురావాలని ఆకాంక్షించారు. విద్యార్థుల సంక్షేమం, ప్రభుత్వ విద్యావ్యవస్థ అభివృద్ధి కోసం ప్రభుత్వం చేపడుతున్న కార్యక్రమాలకు ప్రతి ఒక్కరూ సహకరించాలని పిలుపునిచ్చారు.
పేద విద్యార్థుల ఆకలి బాధలను తీర్చి, వారి విద్యాభ్యాసానికి అండగా నిలుస్తున్న తెలంగాణ అల్పాహార కార్యక్రమం ప్రభుత్వ పాఠశాలల్లో విద్యార్థుల హాజరు, చదువుపై ఏకాగ్రత పెంపొందించేందుకు తోడ్పడుతుందని తెలిపారు.
ఈ కార్యక్రమంలో *జిల్లా స్థానిక సంస్థల అదనపు కలెక్టర్ చంద్రయ్య , బెల్లంపల్లి ఎంఈఓ , బెల్లంపల్లి మున్సిపల్ చైర్‌పర్సన్ దావ స్వాతి రమేష్ బాబు , మార్కెట్ కమిటీ చైర్‌పర్సన్ రత్నం సుకుమారి , స్థానిక కౌన్సిలర్ జంగం కల్పన కాంగ్రెస్ పార్టీ పట్టణ అధ్యక్షులు బండి ప్రభాకర్ యాదవ్ *, ఉపాధ్యాయులు, ఉపాధ్యాయురాలు, విద్యార్థులు, కాంగ్రెస్ పార్టీ నాయకులు, కార్యకర్తలు తదితరులు పాల్గొన్నారు.
