సింగరేణిని కాపాడాల్సిన అధికారులే అక్రమ నిర్మాణాలకు అండగా నిలుస్తున్నారా? ఆర్జీ-3 జీఎం, ఎస్టేట్ అధికారులపై సీఎండీ, డైరెక్టర్‌ (పా)కు ఫిర్యాదు చేస్తాం.
అక్రమ నిర్మాణాలు, సస్పెన్షన్‌ నోటీసులపై సమగ్ర విచారణ జరపాలి: బీజేపీ ఎంపీటీసీల ఫోరం మాజీ పెద్దపల్లి జిల్లా అధ్యక్షుడు మొలుమూరి శ్రీనివాస్‌
అర్జున్ సమాచారం | అక్టోబర్ 11 | రామగిరి రిపోర్టర్.
రామగిరి: సింగరేణి సంస్థను కాపాడాల్సిన బాధ్యత కలిగిన అధికారులే అక్రమ నిర్మాణాలకు అండగా నిలుస్తున్నారా? అంటూ బీజేపీ ఎంపీటీసీల ఫోరం మాజీ పెద్దపల్లి జిల్లా అధ్యక్షుడు మొలుమూరి శ్రీనివాస్‌ ప్రశ్నించారు. రామగుండం-3 (ఆర్జీ-3) ఏరియాలో జనరల్‌ మేనేజర్‌ (జీఎం), ఎస్టేట్ అధికారుల పనితీరుపై పలు అనుమానాలు ఉన్నాయని, ఈ వ్యవహారాలపై సింగరేణి సీఎండీ, డైరెక్టర్‌ (పా)కు ఆధారాలతో సహా అధికారికంగా ఫిర్యాదు చేస్తామని వెల్లడించారు.
సింగరేణి సంస్థ వేలాది మంది కార్మికుల శ్రమతో నడుస్తోందని, అటువంటి సంస్థ ప్రయోజనాలను పరిరక్షించాల్సిన అధికారులు తమ విధులను బాధ్యతాయుతంగా నిర్వర్తించాలని శ్రీనివాస్‌ అన్నారు. సంస్థ పరిధిలోని అక్రమ నిర్మాణాలు, అనుమతులు, ఎస్టేట్ వ్యవహారాలపై నిష్పక్షపాతంగా విచారణ జరిపించాలని డిమాండ్‌ చేశారు. ఆరోపణలు విచారణలో నిర్ధారణ అయితే బాధ్యులపై సంస్థ నిబంధనల ప్రకారం చర్యలు తీసుకోవాలని కోరారు.
ప్రశ్నిస్తే నోటీసులు పంపడం ఏమిటి?
సింగరేణిలో జరుగుతున్న పరిణామాలపై ప్రశ్నిస్తే నోటీసులు పంపడం ఏమిటని శ్రీనివాస్‌ ప్రశ్నించారు. తప్పు చేయనప్పుడు భయపడాల్సిన అవసరం ఏముందని, తమ ప్రశ్నలకు సంబంధిత అధికారులు స్పష్టమైన సమాధానాలు ఇవ్వాలని అన్నారు. సింగరేణిలో విధులు నిర్వహిస్తున్న ఇద్దరు సెక్యూరిటీ సిబ్బందికి సస్పెన్షన్‌ లేఖలు ఎందుకు జారీ చేశారో, వారు చేసిన తప్పేమిటో అధికారులు వెల్లడించాలని డిమాండ్‌ చేశారు.
సింగరేణి ఆస్తులకు నష్టం జరుగుతున్నా, దొంగతనాలు జరుగుతున్నాయనే ఆరోపణలు వస్తున్నా అధికారులు ఎందుకు స్పందించడం లేదని ప్రశ్నించారు. అధికారులపై దాడులు జరిగిన సందర్భాల్లో చట్టపరమైన చర్యలు తీసుకున్నారా? ప్రైవేట్‌ వ్యక్తులకు అధికారులు ఎందుకు మద్దతుగా నిలిచారనే అంశాలపై స్పష్టత ఇవ్వాలని కోరారు. కార్మికులపై ప్రైవేట్‌ వ్యక్తులు దాడులకు పాల్పడితే అధికారులు పట్టించుకోరా? అని నిలదీశారు.
అక్రమ నిర్మాణాలపై సమగ్ర విచారణ జరపాలి
సింగరేణి సంస్థలో రాజకీయాలకు తావివ్వకుండా అధికారులు తమ విధులను నిష్పక్షపాతంగా నిర్వర్తించాలని శ్రీనివాస్‌ సూచించారు. సంస్థ ఆస్తుల పరిరక్షణ, కార్మికుల హక్కుల విషయంలో ఎలాంటి నిర్లక్ష్యం ఉండకూడదన్నారు. కాంగ్రెస్‌, బీఆర్‌ఎస్‌, బీజేపీ తదితర పార్టీల నాయకులు లేవనెత్తుతున్న సమస్యలపై ఒకే విధమైన నిబంధనలు అమలు చేయాలని, ప్రశ్నించే వారిపై నోటీసులు జారీ చేసి సమస్యలను పక్కదారి పట్టించవద్దని పేర్కొన్నారు.
ఆర్జీ-3 పరిధిలోని అక్రమ నిర్మాణాలు, ఎస్టేట్ వ్యవహారాలు, సెక్యూరిటీ సిబ్బందిపై తీసుకున్న చర్యలపై ఉన్నతాధికారులు సమగ్ర విచారణ జరిపించాలని డిమాండ్‌ చేశారు. ఇందుకు సంబంధించిన ఆధారాలను సీఎండీ, డైరెక్టర్‌ (పా)కు అందజేసి, విచారణ పురోగతిని ప్రజలకు తెలియజేస్తామని మొలుమూరి శ్రీనివాస్‌ స్పష్టం చేశారు. సింగరేణి సంస్థ ఆస్తుల పరిరక్షణతో పాటు కార్మికులకు న్యాయం జరిగే వరకు తమ పోరాటం కొనసాగుతుందని తెలిపారు.
