రాజాపూర్ గ్రామ నిర్వాసితులకు న్యాయం చేయాలి,ఓసీపీ-2 గని విస్తరణలో ఇళ్లకు పరిహారం అందేలా చూడాలి.
కేంద్ర మంత్రి బండి సంజయ్‌ను కోరిన బీజేపీ సీనియర్ నాయకుడు మాటేటి రాజబాబు.
అర్జున్ సమాచారం | రామగిరిప్రతినిధి అక్టోబర్ 11.
పెద్దపల్లి జిల్లా రామగిరి మండలం రాజాపూర్ గ్రామంలో ఆర్జీ-3 పరిధిలోని ఓపెన్‌కాస్ట్ ప్రాజెక్టు-2 (ఓసీపీ-2) గని విస్తరణలో భాగంగా ఇళ్లకు కేటాయించిన ప్రాజెక్టు నంబర్ల ఆధారంగా అర్హులైన ప్రతి ఇంటి యజమానికి న్యాయం జరిగేలా చూడాలని బీజేపీ సీనియర్ నాయకుడు మాటేటి రాజబాబు కేంద్ర మంత్రి బండి సంజయ్ కుమార్‌ను కోరారు.
గని విస్తరణలో భాగంగా రాజాపూర్ గ్రామంలో ఇళ్లను సర్వే చేసి గృహాలకు ప్రాజెక్టు నంబర్లు కేటాయించినట్లు ఆయన తెలిపారు. ఈ నంబర్లను పర్మినెంట్, టెంపరరీ నంబర్లుగా విభజించడంతో పాటు, ప్రస్తుతం నివాసం ఉన్న ఇళ్లు, నివాసం లేని ఇళ్లుగా వర్గీకరించినట్లు పేర్కొన్నారు.
అయితే, ప్రస్తుతం నివాసం లేని ఇళ్లను పబ్లిక్ డిక్లరేషన్ నుంచి తొలగించడంతో ఆయా గృహాల యజమానులకు పరిహారం అందకుండా పోయే ప్రమాదం ఉందని రాజబాబు ఆందోళన వ్యక్తం చేశారు. ఒక ఇంట్లో ప్రస్తుతం ఎవరూ నివసించకపోవడానికి అనేక కారణాలు ఉండవచ్చని, కేవలం నివాసం లేదనే కారణంతో పరిహారం నుంచి తొలగించడం సమంజసం కాదని అన్నారు.
సర్వే సమయంలో ప్రతి ఇంటికీ ప్రాజెక్టు నంబర్లు కేటాయించి పరిహారం అందుతుందనే నమ్మకం కల్పించిన తర్వాత, ప్రస్తుతం గ్రామంలోని సుమారు 450 ఇళ్లకు పరిహారం ఇవ్వబోమని అధికారులు చెబుతున్నట్లు ఆయన పేర్కొన్నారు. ఇదే జరిగితే రాజాపూర్ గ్రామ ప్రజలు తీవ్రంగా నష్టపోయే అవకాశం ఉందని ఆవేదన వ్యక్తం చేశారు.
గ్రామంలోని ప్రతి అర్హమైన గృహానికి న్యాయం జరిగేలా ప్రభుత్వం, సింగరేణి అధికారులు స్పందించాలని కోరారు. పబ్లిక్ డిక్లరేషన్ నుంచి తొలగించిన ఇళ్ల వివరాలను మరోసారి పరిశీలించి, అర్హులైన గృహ యజమానులకు న్యాయబద్ధంగా పరిహారం అందేలా చర్యలు తీసుకోవాలని విజ్ఞప్తి చేశారు.
ఈ సమస్యపై కేంద్ర మంత్రి బండి సంజయ్ కుమార్‌ను కలిసి గ్రామ ప్రజల ఇబ్బందులను వివరించినట్లు మాటేటి రాజబాబు తెలిపారు. దీనిపై స్పందించిన కేంద్ర మంత్రి, రాజాపూర్ గ్రామ సమస్యతో పాటు తాను ప్రస్తావించిన అంశాలపై విచారించి తగిన వివరాలు తెలుసుకుంటానని హామీ ఇచ్చినట్లు ఆయన వెల్లడించారు.
రాజాపూర్ గ్రామ ప్రజలకు ఎలాంటి అన్యాయం జరగకుండా సంబంధిత అధికారులు సమగ్రంగా పరిశీలించి, అర్హులైన ప్రతి ఒక్కరికీ న్యాయం చేయాలని గ్రామస్థులు కోరుతున్నారు.
