హైదరాబాద్, జూలై 25,అర్జున్ సమాచారం:
విలక్షణ నటుడు నారా రోహిత్ జన్మదినాన్ని పురస్కరించుకుని తెలుగు రాష్ట్రాల్లో ఆయన అభిమానులు ఘనంగా వేడుకలు నిర్వహించారు. కేక్ కటింగ్ వంటి సంప్రదాయ వేడుకలతో పాటు సమాజానికి ఉపయోగపడే పలు సేవా కార్యక్రమాలు చేపట్టి తమ అభిమానాన్ని చాటుకున్నారు.
హైదరాబాద్, తిరుపతి, విశాఖపట్నంలో నిర్వహించిన భారీ రక్తదాన శిబిరాల్లో అభిమానులు, యువత పెద్ద ఎత్తున పాల్గొన్నారు. ఈ మూడు కేంద్రాల్లో కలిపి 329 యూనిట్ల రక్తాన్ని సేకరించి అవసరమైన రోగులకు అందించేందుకు బ్లడ్ బ్యాంకులకు అందజేశారు.
అదే విధంగా ఆంధ్రప్రదేశ్, తెలంగాణ రాష్ట్రాల్లోని పలు ప్రభుత్వ ఆసుపత్రుల్లో రోగులకు పండ్లు, బ్రెడ్, భోజన పొట్లాలు పంపిణీ చేశారు. బస్ స్టాండ్లలో ప్రయాణికులకు తాగునీరు, మజ్జిగ, పండ్లు, అల్పాహారం పంపిణీ చేశారు. అలాగే అనాథాశ్రమాల్లో చిన్నారులతో కలిసి జన్మదిన వేడుకలు నిర్వహించి వారికి భోజనం, పండ్లు, స్వీట్లు, నిత్యావసర వస్తువులు అందజేశారు.
ఈ సందర్భంగా అభిమానులు మాట్లాడుతూ, నారా రోహిత్ సామాజిక బాధ్యతను స్ఫూర్తిగా తీసుకుని ప్రతి ఏడాది ఆయన జన్మదినాన్ని సేవా కార్యక్రమాల ద్వారా నిర్వహిస్తున్నామని తెలిపారు. రక్తదానం మహాదానమని, సమాజానికి ఉపయోగపడే కార్యక్రమాల్లో యువత మరింత ముందుండాలని పిలుపునిచ్చారు.
జన్మదిన వేడుకలను కేవలం సంబరాలకు పరిమితం చేయకుండా రక్తదానం, ప్రభుత్వ ఆసుపత్రులు, బస్ స్టాండ్లు, అనాథాశ్రమాల్లో సేవా కార్యక్రమాలు నిర్వహించడం ద్వారా నారా రోహిత్ అభిమానులు సామాజిక బాధ్యతకు ఆదర్శంగా నిలిచారని పలువురు ప్రశంసించారు.
“సౌండ్ ఇంజనీర్” ఫస్ట్ లుక్ విడుదల
జన్మదిన కానుకగా నారా రోహిత్ నటిస్తున్న “సౌండ్ ఇంజనీర్” చిత్రం ఫస్ట్ లుక్ను చిత్రబృందం విడుదల చేసింది. విభిన్న కథలు, వైవిధ్యమైన పాత్రలను ఎంచుకుంటూ ప్రత్యేక గుర్తింపు తెచ్చుకున్న నారా రోహిత్ ఈ చిత్రంలో మరో కొత్త కోణంలో కనిపించనున్నారనే సంకేతాలను ఫస్ట్ లుక్ అందించింది. సరికొత్త లుక్, ఆసక్తికరమైన కాన్సెప్ట్తో విడుదలైన పోస్టర్ అభిమానులను, సినీ ప్రేక్షకులను విశేషంగా ఆకట్టుకుంటోంది. ఇప్పటికే సోషల్ మీడియాలో వైరల్గా మారిన ఈ ఫస్ట్ లుక్ సినిమాపై భారీ అంచనాలను పెంచింది. నారా రోహిత్ కెరీర్లో “సౌండ్ ఇంజనీర్” మరో విభిన్నమైన, విజయవంతమైన చిత్రంగా నిలుస్తుందనే ఆశాభావాన్ని అభిమానులు వ్యక్తం చేస్తున్నారు.
