ట్రంప్ దెబ్బతో అమెరికా చదువులకు బైబై….యూరప్కు వరుస కట్టిన విదేశీ విద్యార్థులు,
వాషింగ్టన్ : అర్జున్ సమాచారం డెస్క్ నవంబర్ 17.
అమెరికా అధ్యక్షుడు డొనాల్డ్ ట్రంప్ ప్రవేశపెట్టిన కఠిన వలస విధానాలు, వీసా తనిఖీలు, అపాయింట్మెంట్లలో జాప్యంతో ఈ ఏడాది అక్కడి యూనివర్సిటీల్లో అంతర్జాతీయ విద్యార్థుల చేరికలు తగ్గుముఖం పట్టాయి. అదే సమయంలో విద్యార్థులు యూరప్, ఆసియా దేశాలను ప్రత్యామ్నాయంగా ఎంచుకుంటున్నారని తేలింది. సీటెల్లోని యూనివర్సిటీ ఆఫ్ వాషింగ్టన్లో వరుసగా రెండో ఏడాది విద్యార్థుల సంఖ్య పదేండ్ల కనిష్ఠానికి చేరింది. ఒహియో స్టేట్ వర్సిటీలో 13 శాతం తగ్గి 16 ఏండ్లలో అత్యల్ప స్థాయికి చేరింది. ఇల్లినాయిస్ ఇన్స్టిట్యూట్ ఆఫ్ టెక్నాలజీ విద్యార్థుల తగ్గుదలతో తన ఎండోమెంట్ నిధుల నుంచి 200 మిలియన్ డాలర్ల వరకు అప్పు తీసుకోవాలని యోచిస్తున్నది. వీసా జాప్యాలు కరోనా సమయంలో కంటే ఈ వేసవిలో దారుణంగా ఉన్నాయని ఎన్ఏఎఫ్ఎస్ఏ డైరెక్టర్ ఫాంటా అవ్ తెలిపారు. తాజా సర్వేలో ఆగస్టు-అక్టోబర్ మధ్య యూరప్లో 50 శాతం కళాశాలల్లో అండర్గ్రాడ్యుయేట్, ఆసియాలో 59 శాతం విద్యాసంస్థల్లో పీజీ విదేశీ విద్యార్థుల సంఖ్య పెరిగింది. ఎఫ్-1 వీసాదారులు చదువు తర్వాత సంబంధిత రంగంలో పనిచేసేందుకు ఉపయోగపడే ఓపీటీ కార్యక్రమానికి ఒక్కో విద్యార్థి 70 వేల డాలర్లు చెల్లించేలా ట్రంప్ ప్రభుత్వం ప్రతిపాదించింది. కొన్ని కొత్త హెచ్-1బీ పిటిషన్లకు లక్ష డాలర్లకు పైగా ఫీజుల ప్రతిపాదన కూడా ఉంది.

